台灣, 一個我去幾多次都唔會厭嘅地方, 北部如是, 南部亦如是, 我甚至搵好晒資料睇下點定居, 記得當時令我卻步嘅原因係薪金, 雖然明白寶島乜都平靚正, 但真係接受唔到份人工倒退到剛畢業嘅水平, 呢個係心理關口問題, 而今次就業展覽之行, 我就發現台灣2016同2017年嘅薪酬水平基本上一樣, 甚至係倒退。
之前我喺香港幫個客請咗幾個人, 一個係HR Officer, 要5年經驗, 個客offer大約港幣20,000-25,000月薪, 另一個係Marketing Executive, 2年經驗, 人工大約港幣17,000-18,000, 仲有CS Officer, 5年經驗, 人工大約22,000-24,000, 我啲客開價好少死錯人, 作為市價指標差唔多, 咁你可以睇睇台北薪酬2017幅圖, 我列咗6個比較熱門嘅行業, 大家可以比對下。
雖然兩地生活指數唔同, 台灣年輕人想hea住過日子當然冇問題啦, 但想置業或者用多餘錢發展其他興趣就好困難, 有份報告甚至話台灣有接近6成打工仔, 曾經試過偷偷做多份freelance或者part-time, 不過用打多份工嘅方式去換取多啲收入並唔係最明智, 你只係用緊體力同時間去換錢, 身體總會透支, 年紀總會大, 無論香港又好, 台灣又好, 我哋搵錢係為生活, 並唔係因為要搵錢而冇咗生活 。
Search